يا مشغلٍ نفسك بكثر التفاكير
لا تكثر التفكير وش فيك قل لي
قرب وخذ فنجال صفرٍ مباهير
مالك وناسٍ بالوطى ما تدلي
روّح عنى نفسك بحلو التعابير
ما تنعقد من عقده الا تحلي
قبلك شكينا بالليال المعاسير
ياما وياما من عناها حصل لي
جنب صديق ينفخ الكير بالكير
احذر تحطه لك رفيق وخلي
ان جيت في حاجه يسوق المعاذير
حذراك عن شرواه خله يولي
عليك في رفقة زبون المخاسير
الخيّر اللي بالمساجد يصلي
اللي بوجه لا لفيته تباشير
طلق الحجاج وفي ضيوفه يهلي
ياما حلا شوف الرجال المناعير
اللي بفعل الطيب ظل مظلي
لطامة العايل سباعٍ مغاوير
خاطرك معهم دايمٍ مسفهلي
وياما حلا نبت الفياض المناوير
والذود في نوّار عشبه مفلي
ودنياك هاذي كلها ما بها خير
ياكود طاعة رب عرشٍ مجلي
مصيرها تقفى كما هفة الطير
اليا انطلق في ساق جولٍ مولي
"مدارات شعبية"