يا قلّ نومي عقب زود التفاكير
لا نمت ليل ولا نهار أهتني به
قضّيت وقتي بين همٍ وتكدير
وبين الجروح اللي بقلبي عطيبه
وأن قلت بمشي جا بدربي معاثير
دربي ظلام وصعب ما ينمشي به
وان جاني الدكتور يأخذ تقارير
ما يكشف اللي داخلي مبتلي به
لو كسرت عيني من الدمع تكسير
والقلب يشكي كل هم يصيبه
ما ظن احصل من يجي دون تأخير
حتى يخفف من ثقيل المصيبة
دام الذي حبه يفوق التعابير
صارت علومه غير الأول غريبة
تشتاقه عيون من أجله مساهير
وما شفت أنا بالزين شوقٍ يجيبه
الله أكبر من خفايا المقادير
ورتني أحوال الزمان العجيبة
أصبح حبيبك فيك يحتاج تذكير
من شان يذكر في خياله حبيبه
"مدارات شعبية"