وقف بقول اللي ببالي من أيام
شي لزوم إني على سمعك أبديه
وقف وخذ بالك ترى هالخبر هام
من راس رجال تهمه مباديه
أكد قراره قبل ما عينه تنام
وريح ضميره من غلاك وبلاويه
قرار مضمونه ترى خاطره شام
طير فلت بعصير من كف راعيه
طير تعلا وانطلق بالفضاء وحام
ما رجعه صوت على الأرض يدعيه
لو جيت له نادم وعضيت الابهام
ما اهتز لك قلبه بعد ما استوى فيه
غلطاتك اللي حطمت عد وأرقام
شابت زلال الحب واحتاس صافيه
غرك زمانك وامتلى راسك اوهام
وقلدت غيرك في خطأه وخطاويه
صارت حياتك من خيالات لحلام
كرهت واقع دنيتك ما تدانيه
تبي قصر عالي ومليان خدام
وأموال وألقاب وشهره وترفيه
لكن يا ترف القدم ريَّح ونام
البس ثياب الواقع اللي مجافيه
والبس على بدر الدجى لفت لثام
وبلاش فكرك كل لحظة معنيه
ولابد يأتي يوم تندم وتنضام
وتعرف مقام كنت تجهل وتجفيه
وإذا حصل وانضمت من عوج الأيام
انت السبب في جور وقتك بماضيه
"مدارات شعبية"