إن كان بعت الموده عاد وش يعني
نفس تبي البعد ترحل واذنها معها
لا تحسب انك ليا قضيت توجعني
وانا لي شهور متوقع وبايعها
يوم اني أقول يا بن الناس طاوعني
دربك غلط وانتحيته وانت تسمعها
ضعت وبغيت بعما رايك تضيعني
والحمد لله يوم الله سنّعها
تدري وش اللي دبل كبدي ولو عني
وشلون صدقت كذبه وانت بادعها
تقول: ابي البعد لكن لا تقاطعني
جمله محال على العقَّال تبلعها
قبل تجيني معوّد لي تراجعني
اوقف مع النفس في ذمة وراجعها
قالوا لك ان المفارق راح يدفعني
احبك أكثر.. خرافه وانت طايعها
ماهي سوالف ترى يالغادي المعني
يعني (مع الخيل يا شقرا) تتوبعها
وان قالوا تحبه؟ أبا أقول: ولعني
بس البشر ما اتحكم في طبايعها
تبغى البعاد؟ أرو مني بعد واشبعني
كلمة رجل لا نطق ما عاد يتبعها
لا قلت لك روح روح ولا تطالعني
الكلمة الاولى ما عاد ارجّعها
شوفتك هالحين ابد ما عاد تنفعني
ان كان ما تنبش جروحي وتوجعها
فراق، ضيقه، هموم، دموع، وش يعني
بسلي النفس عنك بشي ينفعها
"مدارات شعبية"