حالي تغيظ اعداي يابو مناحي
أقولها لك وانت من جاك قلّه
لو كل من يهتز لا اهتز طاحي
كان الشجر ما فيه عودٍ محلّه
سلّم مثل من جاء يسلّم وراحي
لا تنشد المفجوع عن ما حصلّه
الصبر في بعض المواقف سلاحي
لا سل وقتي سيفه الصبر اسلّه
صبرت لو الصبر سمٍ ذحاحي
وداويت به علّه على حساب علّه
الناس تسعى فالمساء والصباحي
والعصر كل يعجبه طول ظلّه
ومن يحسب التسبيح لعب السباحي
اذّن وصلّى الفرض قدّام حلّه
وبعض السوالف جد لو هي مزاحي
سوات من خامس رفيقه وتلّه
أنسى واعرّضها هبوب الرياحي
ماني وراء من زل طرّاد زلّه
هو ناحي عني، وانا عنه ناحي
أدل ما يجهل، وما أجهل يدلّه
ماهوب قد التجربه والنجاحي
أبعد عنه، واليا ابتعد قلت خلّه
ليت الخساره ريشةٍ من جناحي
مير الليالي حتّت الريش كلّه
"مدارات شعبية"