عزاه يا قلبٍ من الشوق مضهود
في بسرته نار توقد لهبها
قامت تلظى داخل الجوف وتزود
شبت ومن عرش الضماير حطبها
واللي جرالي من سبب نظرة السود
خرس العيون اللي ظليل هدبها
يا أهل الهوى من دونه الدرب مسدود
والروح من بعده كثير عطبها
وأنا عذابي من غلى لين العود
خشف موازين المحبة قلبها
خل يخلي كامل العقل مفقود
شبه الغزال اللي حياتي نهبها
مصيونة عن كل نقص ومنقود
غير الجمال وحسنها زين أدبها
درة بحر روضة رياحين وورود
والرب من حسن الطبيعه وهبها
تلبس ذهب والماس واسوار وعقود
ومن حسنها الباهي تجمل ذهبها
وعمري قضى واللي مضى صعبٍ ايعود
صارت حياتي ضايعه من سببها
مدري عن الأيام والوقت محدود
ما عاد أميز حجّها من رجبها
"مدارات شعبية"