اليوم ما فيه واحد بالسعودية...
قدي كذا (مسفهل) ورايقٍ باله
عيديةٍ لا ولا هيب أي عيدية...
تشريف (أمير القصيم) ووقفتي قباله
(فيصل) ولا تقدر حروف الهجائية...
توفي ولو قطرةٍ من بحر أعماله
(فيصل) وحزمٍ وعزمٍ وقو شخصية...
(فيصل) وفصلٍ وصل بأقواله أفعاله
إن جيت للجد/ له وقفة رجولية...
وإن جيت للين فأنت بحسبت عياله
عقلٍ وثقلٍ على روحٍ بالمثالية...
حيدٍ تفيا قلوب الناس بظلاله
البيض عجزن يجيبن (باتعٍ) زيه..
مطنوخ من حد رجلينه وإلى عقاله
يا سيدي لك قسم بالله شعبيه...
يا طيبٍ طيب الله روحه وفعاله
يا سيدي بس لو تسمح لي شويه...
آبتغزل مهوب ب(نوره) و(هاله)
لا والله إلا غزل ب..(أطلق خليجيه)...
اللي غلاها بقلبي ما أحدٍ طاله
خجلا ونجلا ومطنوخه ونشميه...
يقصر شنب من نواها وتقصر حباله
إن جيتها بالجمال آية إلهية...
يخسى (ردي المشاحي) ما لها وماله
وإن جيت لدين يادين الصحابية
ما تلتفت للمغازلجي وجواله
الشفه الموتق والحجاز جنبيه
هي (عمة) الحسن وأبناخيه وأخواله
أم الحلا والغلا وأم الرومانسية
لا جت تساقط عليها القاف بجزاله
أخفض جناحي لها عشقٍ وحنيه
وآله عليها وهي دايم على تآله
بنتٍ لك الله ولا هيب أيت بنيه
واللي عشقها تخلي حالته حاله
مصيونةٍ عن عيون (الحسد) محميه
لعيونها الموت (حل) إن كبرت القاله
إنشد (خلف) في قصيدته الهجائية
وش هي (هزيمة شهر شعبان وهلاله)؟
(يالمملكة) من وأنا ب(الابتدائية)
وأنتي غلاك بخفوقي ترسي جباله
(يالمملكة) ما عليك إن ثارت الهيه
عز الله اللي طمع فيك إنه أردى له
دونك (زعيم) (حكيم) صافي النية
(قرمٍ) (كريم) يشح الوقت بأمثاله
(حرٍ) و(مرٍ) شطيرٍ ينضج الكيه
طيب على الطيب وعاله على العاله
(عبدالله) الله يحفظه من هل السيه
يآمر على رووسنا ما دامنا (رجاله)
(عبدالله) اللي لو أكتب ألف ألفيه
ما طاله الشعر لاقصاره ولا طواله
(دم) ياوطني مرتبتك أنت (الأمامية)
في (راس عيطاً) تفوح بعزك دلاله
وأنا قصيمي وأحبك (يالقصيميه)
قلبي بلاك مهبول وزدتي هباله
(يا قبلة العز) يالدار الحضاريه
ما أحدٍ تقهوى غلاك وهز فنجاله
ماللكرم (يا بريده) فيك (كمية)
إلا إن لقوا عاد (رقمٍ) ما أحدٍ قاله
أهلك راعين (دين) ونارهم (حية)
تقلط على (الحيل) ما تقلط على بياله
عقال وإثقال ما ردوا على (العيه)
وإليا (نبزهم) خبل خلوه بخباله
الله يديم الرخا بك (يالسنافيه)
والله يجنبك شر الوقت وأهواله
وكل عام وأنتي بخير وبرفاهيه
والله يحفظ الوطن ويخلي رجاله
واليوم هالعيد عيدي (يالسعودية)
والعيد هذا لحاله يعني لحاله
عيدية لا ولا هيب أي عيدية
تشريف (أمير القلوب) ووقفتي قباله
"العيد في بريدة"