حر من الجوبه شلع راح تغريب
يا سيف وش هي رمعتك يا ضنيني
انك تعرف الرأي ذيب ولد ذيب
من روس ربع يذهبون الكميني
على ظهور الخيل وساع المضاريب
ليا عدي بهم والاهم المعتديني
الشام جاه ولابه شك ولا ريب
ومنه جبل لبنان حطه يميني
متنحر عاليه زين المشاريب
حلو هواه ومنوة المنتويني
وركب بطياره بحكي المناديب
بحفظ الكريم ولابيد العبد شيني
ما اقول قول بالسديري تكاذيب
كود الوكاد وشفت فعله بعيني
لولب يفك محكمات اللواليب
ويدحم برخص الروح ليا صار شيني
لما يتوب لك هل البطل تتويب
عقب الحدا ما ياصلون الهجيني
مذ عرفته بالعلم معناه بالطيب
ما راوز الدكان للمشتريني
ولا هو من اللي عبب الخام تعبيب
وقلبه على وقم الجديده فطيني
ولا حط له ميزان مثل القصاصيب
وهو يذبح البل كل كوما سميني
وليا صار ما من ضان يذبح من النيب
لاجل الضيوف وفزة المحتديني
يا سيف لو نرقب طويل المراقيب
ترى الخبول اللي لنا لا يميني
اللي حسبك أخو بكل المواجيب
وأنا حسبني من حدا الوالديني
اللي ليا جيته يرحب تراحيب
يفز بي ويفطن القاعديني
متمنعن باللي علم خافي الغيب
اللي ضفى ستره على المستحيني
كحيلان يشباهو حصان الاطاليب
حمولة بافعالهم مقدميني
"مدارات شعبية"