يقول اللي مشى درب الهوى ما نوّخ ركابه
يعرف إن الهوى متعب ومع هذا مشى ما هاب
ولكن فاجأه أمر الحبيب بسيرة غيابه
مثل ما قيل في مصر الشقيقة (فص ملح وذاب)
أنشّد وارتجي علم يطمني من أصحابه
ولكن علمهم علمي تفاجوا وش علامه غاب
تقل ما هوب في الديره غريبه ويش يهقابه
لو إن بموقفي طفلٍ من أسباب العجايب شاب
ولا باقي سوى كل آدمي آقف على بابه
واقول الزين ما جاكم؟ تراني يا عرب منصاب
أفيدوني.. وقولولي.. وش العله.. وش ابطابه!
تراني لا خسرته ما تبقى للخفوق أحباب
هو أحبابي هو أصحابي هو اللي ضعت باسبابه
هو اللي لا حصل شوفه أوقف مرتجف مرتاب
يكهربني بنظراته عليه عيون جذابه
عطاه الله نجلٍ لاجلها تاقف طوال اشناب
احبه حب بدو للحيا والعشب طلابه
تلاقوا وانزلوا خدٍ خضاره طاغي خلاب
الا ياالله تفرجها واشوف الزين واهنابه
ترده سالمٍ غانم عقب فرقا وطول غياب
"مدارات شعبية"