جانا الخبر عاجل نبا يوم الاثنين
نباً خطر يهز كل القلوبي
منه الدول جضت وجوله معزين
توافدوا من كل حدباً وصوبي
لا والله إلا راح رجل الميادين
يرسي ليا دقت طبول الحروبي
مات الفهد عنا زعيم السلاطين
عز الله انه القلوب محبوبي
اللي له التاريخ سطر عناوين
وتشهد على فعله جميع الشعوبي
سياسه وحكمه عند قلب الموازين
اللي ليا ضاقت يبوج الدروبي
صلّوا عليه العصر جمع المصلين
وحطوه في مثواه قبل الغروبي
وهلّوا عليه تراب ربعاً موالين
يسار من القصر المسمّى جنوبي
عساه في الفردوس ينعم بها آمين
الله يجيره من جميع الذنوبي
ابو الارامل واليتامى المساكين
ينفق عليهم مثل صب الغروبي
يمناه تنفق كل يوماً ملايين
شيئاً بلا حسبه وشي محسوبي
ياما رحل ناساً وناس مقيمين
وكلاً من الاجال ماله هروبي
قدامنا راحوا خيار النبيين
يالله يالوالي لوجهك نتوبي
يقطعك يادنيا بها الناس راضين
تسقيك من كاس المرارة شروبي
وجينا لأبو متعب نبايع موالين
وحفظ العهد لازم علينا وجوبي
عبدالله اللي رافعٍ راية الدين
أسد غابة من عرين مهيوبي
سمٍ ذحاحٍ للعداة المعادين
وحلاّل للعسرات عند النشوبي
وسلطان ابو خالد صعوط المجانين
ليا جا نهارٍ به عسام وهبوبي
انا أشهد انه وافياً يوفي الدين
ياما عن المضيوم شال الصعوبي
وصلّوا على المختار قدوة اهل الدين
شفيعنا يوم الهلع والكروبي
"مدارات شعبية"