بدون مناسبة مقدر أغني لو أبي قافين
ونباء موت الزعيم أثر علي وقلت قيفاني
فقيد المملكة ذيع ابوفاته في ضحى الاثنين
اهتز إلها جميع الشعب والقاصي مع الداني
عليه دموعنا هلت ولكن بالقضاء راضين
على فراق البطل نحزن لابد اتهل الأعياني
حكم طير السعد فهد المحنك خادم البيتين
بتوفيقن من المولى ظهر في كل ميداني
مواقف فهدنا ما هي خفية والعرب دارين
له أيادٍ بفعل الصلح وانشد شعب لبناني
وله موقف شرف سجل وذاع بغزوة التسعين
وقال المال واهل المملكة من دون جيراني
غزى جيرانه الطاغي هجدهم والعرب ممسين
معاهم وقف أبو فيصل وراح الخصم خسراني
وتوسعة الحرم يشهد لها الطايف مع الساعين
ومن زار لحرم طيبه يشوف المشهد الثاني
ذكرت أشيا قليله والكثيرة ننظره بالعين
وما يخفى علينا يعلمه خلاق الأكواني
عساه بجنة الفردوس يالسامع نقول آمين
عسى ربي ينور قبره اللي فيه سكاني
وعوضنا بالرجال اللي على درب الهدى ماشين
أبو متعب وبو خالد ولي العهد سلطاني
على رسم المؤسس ما تغير منهج الوافين
سمعنا اخطاب عبدالله ترى الدستور قراني
نبايعهم على القران والسنة ونصر الدين
على المكره وبالمنشط ويهبا كل خواني
مع حكامنا ناقف قبل حين وبعد ذلحين
ولو يزهم أبو متعب يجي شايب وشباني
ولا نسمع لزور الحاقدين وشلة الغاوين
ونثبت ما يزعزعنا كلام فلان وفلاني
وصلاة الله على اللي كلنا لشفاعته راجعين
بذاك الموقف اللي فيه تذهل كل الأذهاني
"مدارات شعبية"