Thursday 4th August,200511998العددالخميس 29 ,جمادى الثانية 1426

     أول صحيفة سعودية تصدرعلى شبكة الانترنت

 

انت في "مدارات شعبية"

عساه بالفردوسعساه بالفردوس



يالله يا معبود يا رب اعنا
على فراق الحاكم اللي فقدناه
ارحم عيونٍ لجل فقده بكنا
يالخالق المعبود يا عالي الجاه
ارحم شعوبٍ من فراقه تونا
تبكي على فقده وتحزن لفرقاه
يا رب في وسط النعيم يتهنا
يا رب انا طالبك بالخير تجزاه
جازه بخير ورحمة منك عنا
واجعل جنان الخلد داره ومثواه
اله الدعا مع صادق الود منا
عساك يا ربي من النار تحماه
عساه بالفردوس دايم يهنا
وعساه من حوض النبي يرتشف ماه
اللي ضحى الاثنين فارق ضعنا
وجتنا الملوك بعالي الصوت تنعاه
فهد العروبة نادرٍ في زمنا
ما فيه مثله ما لقينا حلاياه
سيد ملوك الأرض حامي وطنا
حامي حمى الإسلام والدين بإيداه
يا ما سعى بالخير يا ما تعنا
يا ما عطا الإسلام واجزل عطاياه
رمحٍ على الظالم سليط يسنا
غيثٍ على المحتاج لا جاه يلقاه
سقم المعادي سعد منهو زبنا
ما خاب من جا قاصده يطلب حماه
كم عالٍ قدام رجله تدنا
وكم حاكم عنده يجي يطلب رضاه
باني حضارتنا بجهدٍ وفنا
بسياسته سدنا على من عرفناه
رحل من الدنيا وبعده بقنا
اعماله اللي خلدت طيب ذكراه
له في سويدا القلب قدرٍ يكنا
شعبه مع الأيام ما راح ينساه
والحاكم اللي بالمحبة مكنا
اخوه أبو متعب على خط ممشاه
الفارس اللي لا رحى الحرب دنا
داس المخاطر ما يحسب لعقباه
الطيب تحته عند رجله تثنا
والخير والمعرف ندا بيمناه
اله الولا والحب والطوع منا
نمشي تحت امره على ما تمناه
الشعب يمشي له على ما تمنّا
جينا نبايع بالولا ما ذخرناه
قولوا معي آمين يا رب اعنا
على فراق الحاكم اللي فقدناه

عبدالله مرزوق المرشدي العتيبي

 


[للاتصال بنا] [الإعلانات] [الاشتراكات] [الأرشيف] [الجزيرة]
توجه جميع المراسلات التحريرية والصحفية الى chief@al-jazirah.com عناية رئيس التحرير
توجه جميع المراسلات الفنية الى admin@al-jazirah.com عناية مدير وحدة الانترنت
Copyright, 1997 - 2002 Al-Jazirah Corporation. All rights reserved