يا قلبي إللي تشب النار في جوفه
ويا عيني إللي سهرها طال وأشغلها
والفكر حاير من الهاجوس وصروفه
لا أطفيت نار الغرام أرجع وأشعلها
عليك ياللي ربيع العمر في شوفه
شوفك لعيني يداويها ويكحلها
أنت الذي لك كنوز الحب مصروفه
نرضيك لو باقي الخلان نزعلها
يا فتنة أبيات شعري وأجمل حروفه
فيك القصايد تمتعني وأدللها
نظرات عينك تهز الجيش وصفوفه
تبغاني أثقل ليا شفتك وأجاملها
أرفق بروحٍ على شوفتك ملهوفه
الأمر بيديك تعتقها وتقتلها
حال المولع من الأشواق مكشوفه
وإلا أنت ودك على كيفيك تبهذلها
لو كان الأيام في رجواك مخلوفه
فرقاك عني دقايق ما اتحملها
أرجي سحاب الغلا لا بانت قنوفه
يروي جروح الحبيب اللي مهملها
عشت بعذاب الهوى ما شفت معروفه
تنعاف سيرة غرامٍ هذي أولها
هذي صراحة محبٍ يشرح ظروفه
وإن كان ودك تجاهلها تجاهلها
"مدارات شعبية"