الحمد لله عِد نجمٍ زهيري
وعِد النبات وعِد رمله والأحجار
يامسوي الفنجال والماء غديري
إيزن له الطبخه وهيله بمقدار
خصه وصبه من قبل تستديري
صبه على طير السعد واف الأشبار
صبه على سعودٍ ولا تطيع غيري
إذا جلس صبه وصبه لياثار
يستاهل الفنجال يأخذه جديري
عساه يكتب من طويلين الأعمار
الجامعة جابه سعود الأميري
يارب فكه من صواديف الأقدار
من شان حايل كل يوم يطيري
مثل السنداوي طار من كف صقار
وأدلى على الجزله بكفٍ شطيري
من صغر سنه عاشقٍ صيد الأقفار
حايل بقلب سعود وزنه كبيري
تطورت تغيرت صار ما صار
يصير شيٍ ما توقع يصيري
بجهود أبو فيصل شعم لاهب النار
حبك يابو فيصل لجاء بالضميري
نزيه مخلص صادقٍ بالبلد بار
حايل بقلبه مايطيع المشيري
مع دم جسمه حب حايل مشى وسار
يقول أبو فيصل مصيره مصيري
بالطرق والخدمات والعلم وإعمار
يقول حايل مال حايل خشيري
مدينةٍ عصريةٍ بين الأقطار
حايل بها حاتم وعنتر يزيري
دار الكرم دار الشجاعة لمن دار
ويالله يالمعبود وانت القديري
تشفي فهد يالله ياوال الأقدار
وتعز منهو للمواطن يسيري
هو مفخرتنا ياحصل خوف وأخطار
عبدالله اللي دوم فكره بصيري
أمر بفتح الجامعة فعل وإقرار
وسلطان أبو خالد مع الخير خيري
لبى الطلب يومه لفى الدار زوار
ونايف هو النايف يعيش الوزيري
نايف سنام الأمن والأمن له كار
وصلاة ربي للنبي البشيري
إعداد ماهلَّت من السحب مبدار
"مدارات شعبية"