خاطري يرتاح مع شوفت ازهور الربيع
في فياضٍ تجذب أهل النظر واهل الحلال
من نزل في وسطها زالت اهمومه جميع
ناسي همٍ يصيبه على مر الليال
طاب كيفه والقدم سجها في كل ربيع
كل الأرض مربعه والسما فيها الخيال
ما تكدر خاطره دايمٍ صدره وسيع
مستريح بين جو الطبيعه والجمال
ذي حلات الوقت والوقت في مشيه سريع
ومن نزل لو طولت مدته شد الرحال
ما احدٍ وقته صفى له ولو شانه رفيع
قلت كلمة حق ماهيب من نسج الخيال
والله اني ما اتحسف على مالٍ يضيع
لو يضيع المال جاني بدال المال مال
الحسايف لو وقتي يضيع ولا استطيع
استغله في مجالٍ يفيد بكل حال
اجتهد في طاعة الواحد الفرد السميع
العمل باقي وغيره مرده للزوال
ادري أنه لاعصى الوقت لايمكن يطيع
مار من طاع الولي طال شي مايطال
جامع دينه ودنياه وان سوى صنيع
الوفا والطيب عادة حميدين الخصال
"مدارات شعبية"