لا من بكيت وصحت مانيب مقهور
أبكي فقيد الروح لا شك ببكيه
غصب علي أبكي ولا آخذ الشور
يا عين هلي دمعك اليوم هليه
معذور يا دمع هما ليل معذور
الدمع بان ومقدر اليوم اخبيه
تبكيه روضة مسجد وتبكي الدور
ويبكيه ليلٍ للسحر كان يحييه
وتبكيه ركعات الضحى بدمع منثور
حتى الفروض الخمس تبكي تناديه
وتبكيه شقراء كلها جبال وصخور
وما لوم من يبكي على فقد غاليه
عزيت فيه شموس ونجوم وبدور
والصبح عزيته والليل أعزيه
جاه القدر... يا الله عسى الذنب مغفور
جاه القدر... وش في يدينا نسويه
لا جاء القدر ما ينفعه طب دكتور
لا جاء القدر ما ينفعه حب مغليه
مرحوم يا عم غدى اليوم مقبور
تحت الثرى من تحت لحدٍ يغطيه
يا الله عسى قبره وسيع وبه نور
يا الله عسى المصحف بقبره يسليه
يا الله عسى عقب القبر جنة الحور
يا الله عسى من صافي النهر تسقيه
أرجي له جنانٍ وسيعات وقصور
ونهر العسل والخمر للعم راجيه
يا واحدٍ قادر ولا هوب مقدور
يا واحدٍ كل المخاليف تدعيه
يا رب يا غفار تجزيه بسرور
في جنة الفردوس بأعلى مبانيه
ويلاه يا قلبٍ غدى اليوم مسكور
ويلاه يا دمٍ صعيب أجاريه
ويلاه يا عبرات في صدري تثور
ثارت كما البركان لاثار صاليه
عمٍ فقدته راح بالطيب مذكور
مذكور بالطيبة... وبالخير نطريه
عمٍ فقدته يوم الاثنين ماجور
ماجور يا عمٍ فقدنا حسانيه
عمٍ فقدته راح بالخير مشهور
يا الله يا رحمن بالخير تجزيه
يا الله يا منزل تبارك مع الطور
تنزل السلوان والمن تعطيه
تعطيه قلبٍ صار بالحزن مخطور
مخطور يا قلبٍ غدى الحزن كاسيه
قلبي من الفرقا غدى فيه تنور
تنور في قلبي يزود مكاويه
قلبي على الفرقا غدى اليوم مجبور
فرقا الحبيب اليوم مانيب قاويه
تمت وصلوا عد ما غرد طيور
وعداد وبلٍ نازلٍ من مناشيه
وعداد ما ينبت وسط بر وبحور
على النبي المبتعث نقتدي فيه
"مدارات شعبية"