بعض المواقف في بلدنا غريبه
وبعض العوايد كدّرت لي مزاجي
لو شافها العاقل خطر شق جيبه
والمشكله تزداد دوم اعوجاجي
بعض البشر مقرود من يقتدي به
يتبع هوى نفسه ولا هوب ناجي
وبعض البشر يهمل فروض وجيبه
واليا نصحته قابلك بانزعاجي
وبعض البشر دايم يحارب قريبه
يبدي له البغضاء وكثر احتجاجي
وبعض البشر شره غدى مع صحيبه
في وقت حاجة صاحبه للعلاجي
وبعض البشر ماله عضيد يثيبه
لنه بلا ذمه كثير السماجي
وبعض البشر يظهر على الناس عيبه
لا ما يعرف الستر شين الحجاجي
وبعض البشر كاسب غرور وخيبه
يترك قراح الماء ويشرب هماجي
هذي الحقيقه والحقيقه صعيبه
يا رب نور دربنا بالسراجي
عندي نصيحه للنشامى العريبه
اغلى من اللؤلؤ مع كل عاجي
احذر من امر كل ما فيه ريبه
لو مكسبك منه كثير الخراجي
واحذر تخاوي واحدٍ تبتلي به
بينك وبين الشر اصنع سياجي
واحذر تغش الجار لو في مغيبه
وارفى خماله لو بدى بانعواجي
والختم صلوا عدّ شمسٍ مغيبه
على نبيّ للمخاليق تاجي
