يا بوي أنا مع دربك اللي مشيته
عز وشرف لأهل الوفا والمواجيب
أنا على ظنك.. وطيبك وفيته
متحزّم مثلك على العز والطيب
طيبٍ على المشراف مثلك رقيته
ياللي رقيت بعاليات المراقيب
أنا تراني سيفك اللي بغيته
سيفٍ على يمناك ما به عذاريب
أنا ولدك اللي بعزك ربيته
وأبشر بعزك لو كسا راسك الشيب
واللي على درب الردى ماخويته
بيني وبينه قاطعات العراقيب
حبل الوصل بيني وبينه طويته
اللي يقول إن البداية تجاريب
دربٍ على غير السنع ما نويته
دام البداية والنهاية عواقيب
لو يعتدل درب الردى ما وطيته
الشاهد الله ربنا عالم الغيب
