رصاصة الغدر غيبتي طلال الرشيد
اللي عليه العيون تهل عبراتها
قتلتي الفرحة اللي كانت أيام عيد
وأهل الغدر تأخذ العالم بغراتها
والله حسيب العداه ولا عليها نزيد
يا جعل ربي يواخذها بسياتها
مرحوم مرحوم يا رجل الوفاء والقصيد
يا عل دارك يا أبو نواف جناتها
مرحوم يا الطيب اللي بك نقول ونعيد
صفحتك بيضاء وطيبك في سجلاتها
عز الله إنه يا أبو نواف مثلك فقيد
والغدر زود على أهل الدار لوعاتها
الجرح ينزف ودمع العين عيا يهيد
والله يهون على أمك كل حسراتها
نرجيك يا رب يا اللي تفعل اللي تريد
تفرغ عليها الصبر وتكف دمعاتها
وموتة طلال الرشيد الله عليها شهيد
تقطّع الها القلوب وتكثر شكاتها
واليوم اعزيك يا نواف وانت الرشيد
اللي بعقلك علوم العرف تقتاتها
انت الرجا والعوض عساك دايم سعيد
من روس قوم لها العليا وطالاتها
عن سكة الوالد الخضراء حشا ما تحيد
عسى الليالي تضوى لك مسراتها
وتعيش بالعز يا نواف عمر مديد
والله يكافيك من بقعاء وصكاتها
يا بن طلال الرشيد انته لبيته تشيد
والعادة الطيبة تبقى لساداتها
وتكون في نفس ابوك اللي بفعله حميد
الفرق فرق الاسم والنفس هي ذاتها
