هلا بك يالسحاب اللي لفا واستبشرت داري
بعد ما طول غيابك وداري ذبلت أزهاره
بعد ما جف خفّاقي «لحفه» القبض «والذارير»
بعد ما ماتت عروقه بعد ما جفّت أنهاره
بعد ما صرت أنا ليل العذاب ونجمه الساري
بعد ما صرت أنا ليل الحزن والناي وأشعاره
بعد ما غابت الشوفه ولا باقي سوى الطاري
بعد ما طيفك اللي كنت أشوفه قل مسياره
هلا بك والمشاعر من غيابك جرحها عاري
هلا بك وأنت بقدومك يزول الجرح وأخطاره
تراك أنت الوحيد اللي درى عنّي عن أخباري
وتراك أنت الوحيد اللي هويته وأعرف أخباره
وتراك أنت الوحيد اللي عنه قلبي بعد داري
وتراك أنت الوحيد اللي بقلبي عارف داره
وتراك أنت الوحيد اللي عرف بالعشق مضماري
وتراك أنت الوحيد اللي عزف للعشق مزماره
ولا قبلك عرفت العشق أو أنه حل بدياري
أو انه شدّني عشق يجيب القلب لدياره
لفيتك وأنجلا همّي ولا حسبت مشواري
لفيتك وانتعش قلبي وطار الهم وغباره
حللت أهلاً وسهلاً والخفوق بعشقك يماري
وطأت أهلاً وسهلاً لي تزيل الهم وستاره
لفيت وقلت أهلي بك على ما تشتهي داري
هلا بك يالسحاب العذب تعيد لقلبي أزهاره
