هيضني الشعر في وصفه وناديته
وقمت انظم الشعر من زينات الأبيات
ابا انظم الشعر واغني على بيته
وارسل على الصاحب الغالي تحياتي
حبيبي اللي بها الدينا تمنيته
انا اشهد انه مرام النفس ومناتي
زوله رسمته بعيني يوم لاقيته
وفي وسط قلبي من اجمل كل لوحاتي
بأوتار الاعجاب والعرفان غنيته
ولحنت حبه بوسط القلب خفقاتي
مالوم قلبي وعقلي يوم حبيته
ومن لامني ما عرف للحب لوعاتي
لو يخفي القلب همه مع تنهايته
وش يخفي الدمع لاجا الدمع عبراتي
ولو يطلب الخل قلبي جيت واهديته
واعطيت قلبي هدية مع معاناتي
مدام مركب غرامي ما تعديته
وذكراه دايم تجي في كل الأوقاتي
شاعر شربت الهوى كاس وضميته
وبليت ريقي بعد ما يبست اشفاتي
