يا من بكى وأبكى بعاد وقريبين
ليلة فجاه الحزن وأبدى الخوافي
من يؤمن بمنزل تبارك وياسين
يأمن ولو جا بالزمان اختلافي
الموت ياخذ طيبين ورديين
ولا يفقد إلا كل شهمٍ سنافي
واللي مثل مفقود قلبك قليلين
بالمدن واللي يسكنون الفيافي
والدمع ما يبري جروح المحازين
مالك سوى الإيمان والصبر شافي
يا شبل من بانت لطيبه براهين
شيء ثبت لك من ثناكل وافي
ترى كمال الرجل بالعلم والدين
عقلٍ بليا دين صحراً جفافي
أبوك له تقدير عند الوفيين
يعم كل اسمٍ على اسمه يضافي
وأنت الوريث لمجد سفر الحجاجين
اللي على جيله بالأفعال نافي
على دعاك أهل الوفا قالوا: آمين
جعله لباب الاستجابة يوافي
ولك في ذرا سلمان عزً وتمكين
وأمان من جور السنين العجافي
شيخٍ له الطوله بكل الميادين
ولكل خله سامي المجد رافي
ذراه به نجدٍ وأهل متذرين
يعطي قبل يُسأل.. ويوعد ويافي
