وش يقول اللي تعوّد يلتقيك
يوم عمره مالقى عقبك غلا
ما قدر في بعدك إلا يحتريك
وما عرف في غيبتك غير الولا
من يدينه غاية النفس بيديك
إعتلت بالحب والحب اعتلا
كم تمنى بالوفا لو يحتويك
في خفوق باصدق الود امتلا
لو بيدّه بس، لو يقدر يجيك
ما يحول الوقت دونه والملا
كيف يستكثر طموح العمر فيك
دام قلبه عنك عمره ماسلا
شوقك اللي ما خفا شوقه عليك
بان به صدق المشاعر وانجلا
حق لك به تفتخر دامه يبيك
وحق له بك يلتقي صدق الغلا
