بلادي.. الله ما أحلى اسمك على لساني
ماكن ربي خلق غير السعوديه
لي حق افاخر بحبك بين الأوطاني
ما دمتي القبله الغرا ومحميه
محمية في حما الله طول الأزماني
من سوّلت نفسه ابغىً شرب غيّه
للبيت رب حمى من كل عدواني
يوم إن فيل ابرهه ما انقاد جبريه
وما دام للشرع منهاج وعنواني
في دارنا.. الخير له مرسى وله فيّه
بلادي.. الله يا صبرك على أحزاني
ما كن بحرك سوى عطفٍ وحنيّه
أجيك والهم فيني مثل «ثرباني»
واروح من شط بحرك فرحتي حيّه
الله ما اغلاك في مكنون وجداني
غلاوتك في فؤادي ما هي اشويّه
حبك سكن في معاليقي وشرياني
تمكن بخافقي ميّه على ميّه
يا تاج الأوطان يا نبراس الايماني
يا منهل العز بالحاضر وماضيه
غيرك في الكون لا والله ما اغراني
تذوب الأوطان لا شفتك بعينيه
مغرم صبابه بحبك يا أعذب ألحاني
واشفق على شوفتك في ذاك وهنيّه
أحسك انفاسي اللي ما تعدّاني
لا راحت تعود شفقاته على الجيّه
حبك شربته وأنا في المهد ريّاني
وكبرت وازداد حبك في محانيّه
ما هو بكيفي غرامك خالط أشجاني
كذا من الله سكن في مهجتي ضيّه
وان كان تبغى الحقيقة فيك هيماني
من حل بارضك نسى بيّه نسى خيّه
من لامني في غرامك جاهلٍ جاني
ما يعرف العشق ما يعرف معانيّه
ما يدري إن المحبة روح الأبداني
والروح بالحب مأموره ومنهيّه
تأمر فوادٍ حضر لك قاصد عاني
يا بعد من عاش بالدنيا ومن ليّه
تأمر فؤادٍ يقول لك العمر فاني
لو ما فديتك به إش قيمة لياليّه
والشعر وش قيمته في كل ميداني
إلا بطرياك يصبح كامل الليّه
يزهى بذكرك وعطره منك ريحاني
يفخر بشرعك وينقابك في الهيّه
طرياك يحضر بطريا ذرب الايماني
عبدالعزيز الامام الصافي النيّه
«معزي» القايد المقدام والباني
اموحد الدار شرقيه وغربيّه
شيخ الوفا والشرف منهال الاحساني
الماجد اللي له الرايات محنيّه
الله يسكنه في روضات وجناني
ويرزقه ربنا ميتين حوريّه
وليا حضرتي حضر شيخ ورباني
القايد اللي رقينا معه الألفيه
فهد الفهود المفدى عالي الشاني
اللي وقف للمعادي وانضج الكيّه
واخوه عبدالله المخلص وسلطاني
كسابة المجد في شمس وفي فيّه
هذا وأنا مالكي وأفخر بعرباني
آل السعود اللي لهم قدر وتحيّه
كسابة المجد في نجد البريحاني
أقولها والنعم ميّه ومثنيّه
بلادي.. الله ما أحلى اسمك على لساني
ما كِن ربي خلق غير السعوديه
