يالله لك الحمد ماخيبت دعوتنا
رجعت علينا بخير للديره
مشاعر الحب ما توصف وفرحتنا
من يوم شفناه يمشي زالت الحيره
عادت بعد رحلة علاجه سعادتنا
الله يطول بعمر الشيخ ويجيره
من حقنا اليوم لو هاضت قريحتنا
الشعر بملوكنا يغري شواعيره
نايف عضيد الملوك ورمز دولتنا
له عندنا مثلهم وزنه وتقديره
من هيبته شلة الاشرار هابتنا
ما احدٍ يهوط الحمى دونه نواطيره
من يسهر الليل كله لاجل راحتنا
من يحرس أرواحنا وأملاكنا غيره
دام الاسد في عرينه ما تهقوتنا
الامن دونه رجال ونايف يديره
الله يعز الوطن في ظل قادتنا
اللي لها الفضل بعد الله بتطويره
حكومة عادلة تحفظ كرامتنا
تمشي على سنة الهادي وتفسيره
وحنا مطيعين لله ثم حكومتنا
على الولا من كبير الشعب وصغيره
ما همنا من يحاول هز وحدتنا
نعرف هدف حاقد ينفخ مزاميره
كلش ولا اللي يشكك في عقيدتنا
ما يدري انا هل التوحيد والسيره
