بديت ذكر الله على كل الأحوال
ذكر الله البادي على قول قيله
الخير اللي يقسم الرزق عمال
اللي نهار الضيق ينجي دخيله
والرزق عند الله وهو معطي المال
رب الملا مسقي الرياض المحيله
يا مودع الدنيا علينا بالاقبال
يا الله لا تسعى لنا بالفشيله
اطلبك بيت مروبع كنه الجال
أبي النشاما يجلسون ابمقيله
مع منسف يلبق على الضيف باعجال
وازبره من عند ربي مكيله
واطلب من المولى معاميل ودلال
يخلط بهن حب اليمن هو وهيله
بوجودهن وجهي عن العمس ينزال
ثم التهي بين الحطب والنثيله
يلقط عليه الشغدلي طيب الفال
ويلكف الفنجال للي يجي له
مع هرج ربع كنها در الابهال
يدله بها اللي نازح عن قبيله
هذا مناي ولا تمنوه الانذال
والرزق عند اللي يسوق المخيله
ما هو جقم صيدي تشفي بالافعال
واللي يدير الهرج ربي وكيله
يا الغافلين اللي عن الموت جهال
خوذوا من الدنيا ولا هي طويله
القلب عيا لو عذلتوه يا الخال
القلب يتبع بالمماشي دليله
قالوا يعيل وقلت خلوه لو عال
العايل اللي ما يحوش النفيله
حط الصخى يسوى كثير من المال
كدوا عليها مالقوها قليله
تسوى حياة اللاش مذموم الاخصال
متجهد لحريمته في حصيله
عسى تدور حرمته فيه الابدال
لا عاد ما يومي لهن في شليله
لمحلا لاجن من البعد نحال
من ثوروا بارقابهن تقل نيله
قاموا وخلوا شلقة داخل الصال
ومتناثر حب اللقيمي عكيله
دنياك لذتها وناسه وفنجال
والرب مداته علينا جزيله
