انا اشهد اني ما تمنيت فرقاك
وانا اشهد اني ما ندمت وبكيتك
رحلت تحسبني بجيك اترجاك
ما دام رحت وبعتني ما شريتك
غرورك اللي حطمك لا عدمناك
ياما تحملتك... وياما نهيتك
لاتفكر اني ما اقدر احيا بلياك
احيا بفضل اللي بعزه يميتك
الحب ما يهدمه مثلك وشرواك
الحب يبقى رمز في غير بيتك
قصدك تشمّت فيّ ذولى وذولاك
تخسى فأنا اللي قبلهم قد حميتك
عرفت بان المصلحة من مزاياك
قناعتك تكفي وأنا ماهقيتك
من عقبها بان الندم في محياك
مكتوب من تقسيم وجهك قريتك
مسكين جيت تقولّي مقدر انساك
رجعت متلهف وانا ما رجيتك
رديت وأنا اردي بقصدك ومغزاك
خلاص!.. لا تحاول نسيتك نسيتك
