مدحٍ بلا فعلٍ قليل حصيله
ياكثر سياسته على عرض راعيه
الزند ما يقدح بليا فتيله
ولا يشب النار وانته مطفيه
وليا تردى الحظ مافيه حيله
مثل العمى اللي مالقى من يقديّه
والناس اوادم تختلف بالفصيلة
وكلٍ يحوش اللي قسم له باياديه
ومن حط له حمل تكلف يشيله
لو طالت الطرقة لزومٍ يوديه
ومن زان وجهه في مقابل عميله
لو يطلبه حق ترى العذر يرضيه
والرجل مجبورٍ يراعي خليله
قدّر ظروفه بالهجر لا تجازيه
واليا فعلته في صديقك جميلة
فانسه وبالك عند الاجناب تطريه
والفضل ما يوجد بيمنى بخيله
تذل صاحبها وتخفي حسانيه
ولا كل من يسري بليا دليلة
لولا الدليلة تاه درب بيمشيه
والاجل غيبٍ من منجي دخيله
اللي يميت الآدمي ثم يحييه
احياه وهو اللي يوقّت رحيله
وليا جاء رحيله محدٍ عنه معفيه
