يا حليلنا من أول ماعندنا إلاّ «الكعابه» و«المصاقيل» هي اللي توسع صدورنا يوم حنا صغار أما عيال هالوقت «أتاري» وإنترنت ودش ووو.. الله يذكر أيام المصاقيل بالخير!.
** وصفة أم راشد لتخفيف الوزن «حلبه + حلتيت + مُرة» على فكة الريق وحلاوة «صَعو» قبل النوم!
إنتبهوا ياحريم، هالوقت يا «السمينات» لاتخفون وتصدقون أم راشد!!..
** جدتي الله يطول عمرها كانت «تغطَّي» عن التلفزيون ايام الأبيض والأسود ولا «تفتش» لأي رجال يظهر على الشاشة.. وينها من بنات هالوقت اللي مايطيح «الريموت» من يدها؟!..
** ما يعجبني من الشاعرات إلا «غيوض» و«بنت أبوها» ما أدري «بنت أمها» وقناديل والراسية والباقي ماعندك أحد!..
** جتني رسالة على جوالي يقول مرسلها «كن وجهك بعير أبوسنامين» رديت عليه برسالة قلت فيها «كن وجهك ثور يسوى رجيم»!!..
** الله أكبر أول عيديتنا «قريض وملبس وسيسبان» واليوم عيديتهم ألعاب نارية وتشخيص و«طاقية زري» لا وما يعجبهم إلا «الزرقاء» أم خمس ميه «الريال والخمسة والعشرة والعشرين والخمسين والميه ماتنفع معهم»!!..
** روعني الفلكي اللي يقول حنا الآن في مربعانية الصيف يا أخوي مانعرف إلا مربعانية الشتاء الله يعينا على طباخ التمر عفواً «طباخ البشر»!!
** اسمعوا «الأفراح» جايه وممنوع «المغاتير» وأصطحاب الأطفال بس مسموح «دق الحنك» والملابس «الصارخه» واللي مامعها جوال ممنوع الدخول!!
** واحد فنان اسمه فارس مهدي او مهدي فارس دايم يقلد خالد عبدالرحمن يبغى ينشهر زيه بس ماقدر لكن بنت «العسلي» جابت له الشهرة يوم غنى معها «دويتو»!!..
** الجمل الصغير يطلق عليه «بعير.. حاشي.. قعود.. هرش» اختاروا الإجابة الصحيحة وللفائز منكم له عندي «كبدة ثور عمره 5 سنين»!!..
** تصدقون عزمني صديقي أبو حسين للعشاء قبل يومين تدرون «وش حط لي»؟ حط لي «لحمة غزال يتيم من موزمبيق»!!..
** استوردنا «البيز» و«الفقع» معاد باقي إلا «الجراد» و«القفر» وعاشت خرفان استراليا!..
** واحد يمدح زاويتي وآخر «يحشها» ما أدري من أصدق الحكم لكم وودي أسمع رأيكم أستمر ولا أوقف!!..
| 
