Al-jazirah

هذه المحاورة جرت بين الشاعرين الكبيرين الشاعر علي أبو ماجد والشاعر/ حمد المغيولي رحمهما الله.
أبو ماجد:

يا سلام الله سلام تقل ماهو بمتساوي
ردةٍ من هاجس اللي يفتح الباب ويصكه
العبوا والعب ما يامر عليه فرينساوي
والذهين اللي يعرف الدرب لو من غير سكه

حمد:

يا هلا من هاجس ماله مثل قلبك مناوي
قالها اللي ما يجي من خاطره ريبٍ وشكه
ان بغيت العب واشاقلك المعاني بالعراوي
خل رادوك ليا غنى على موجات مكه

ابو ماجد:

والله اني عن جميع اللي تهوجس به غناوي
بس بأطراف الشفايا واللسان قراد حكه
مصبحٍ مابي خلاف وممسيٍ تقل امتداوي
ما درى قلبي مريض وبالعزم والحال ركه

حمد:

لا تحسبني من اللي شاعفٍ خاطرك غاوي
كل عظمٍ ما يغرن حد راسه من مفكه
مير انا اغمض وافتح مثل ما قال الهواوي
الشعيب ان سال سيله ما يجنب عن مدكه

ابو ماجد:

تنكر اني في زمانٍ فات لي عزم وهقاوي
يوم بارودي ليا وريتها الطاير تشكه
والموده قد كلاني من مكاويها كلاوي
دوك جسمي من غرامي نقشته نقشة بلكه

حمد:

المولع لو كثر شيبه ولافته البلاوي
لو بغى يترك طريقه جاه هاجوسٍ يدكه
لو حلف في رب طاه سامك العرش السماوي
ما نطيعك.. ما نطيعك.. لا تحسبني مهكه

زهران عون الله المطيري/ بريدة