يا نجر وين اللي يعز الصداقة
اللي يحفظ أسرار ربعه بصندوق
أمين سرٍ فيه حرص ولباقه
قفل كلامٍ ما يصدر لمخلوق
ليا عطيته علم جوّد وثاقه
طبعه وفي دايم وصادق مصدوق
ما ردّدت عنه العلوم الدقاقه
ولا هو على علم التناتيت مسبوق
يا نجر يوم إنا اخوان ورفاقه
هذا الذي تطرب له النفس وتوّق
هذا الذي وافق مذاقي مذاقه
والناس فيها أجناس مختلفة الذوق
من جمّع أذواق العرب وسط باقه
هذا غشيمٍ تايه الراي مطفوق
وأنا مع الطيّب رسمت العلاقه
على صحيح من النوايا عن البوق
مع صاحبٍ معه العلاقة شفافه
على معانٍ ساميه قدرها فوق
وفارقت أنا اللي عيد عندي فراقه
اللي لبس ثوب الصداقة وهو عوق
اللي لسانه حد موس الحلاقة
بوجهك ضحوك وفالقفى سم مدفوق
درّب لسانه لين أجاد اللياقه
على صنع من فرقت جمع وحقوق
يفرح بعلمٍ شين قطّّاع ساقه
أبعد عنه مسراك يا مسرّي النوق
مثلي وأنا اللي عاشقٍ لي عشاقه
حيه معي وإن مت تبقى لماثوق
يا نجر ما تحت النصايب صداقه
أقولها وتدري بها يا ولد روق
كلام من هو علقم المر ذاقه
الشايب اللي شيبه غرب وشروق
