أكيد جيل النيدو و «الأندومي» مايفهمون كلامي بس جيل (المشق) والركوب على (الجذامير) ودفدفة الكفرات بيفهمونها على الطاير لأني واحد منهم!!
* أبو راشد يوم حنا صغار كان يبيعنا (طواقي زري) وهالحين صار يبيع (كابات) على شباب هالوقت لأنه عرف ان الطواقي هالأيام مالها سوق!
* وأم راشد - الله يذكرها بالخير - كانت تبيع «الحنا» والسدر والجاوني وهالحين صارت تبيع الطرطعان والشروخ.. لا.. وتعرف بعد آخر خيوط (الموضة) يا سلام عليك ياأم راشد!
* الله يعين «مخابي» الرجاجيل هالأيام من طلبات «الحريم» اللي تبغى تسافر للخارج واللي تبغى طقم ذهب لفرح فلانة واللي تبغى فستان لفرح علانة.. آه منكم يالحريم!!!
* من شاف منكم في حياته بعير هايج (يزبد) يتذكر على طول وجه شارون أما شكله فيذكرني بأحد ثيران إسبانيا!
* سواق وشغالة وجوال آخر شروط زوجات آخر زمن يا حليل أمهاتنا اللي ماعرفوا هالسوالف!
* سفرية وحدة حولته من موظف في المرتبة الرابعة إلى ملياردير هكذا السفر وإلا فلا! عاشت المواعين وطقوم الصيني اللي عزت الرجاجيل!
* يا من شرى له من حلاله «عِلَّه»! هذه قصة سواق جابوه جيرانا تسبب في ستة حوادث في شهر وصدم بسيارتهم كلها وآخرتها سفروه الظاهر ان مكتب الاستقدام مورطهم في سواق «شيول»!
* ما أدري وش نسوي مع هالمراهقين اللي أزعجونا بالتفحيط في الليل في النهار وفي كل الأوقات وين أبوانهم جعلهم (النزع)!
* يقولون: ان «مايكل شوماخر» أسرع سائق في العالم وأنا أقول أن عندنا مليون أسرع منه..هؤلاء شاهدوهم في الدائري وفي كل الشوارع الله يفكنا من جنونهم!
* بصراحة جاء الصيف وودي أسافر وأدور «البراد» لكن ماعندي (قريشات) أحد بيسلفني منكم وإلا تدرون وش رأيكم أروح للبنك؟!
* الأخت القارئة أشواق الشمري أشكرك على مشاعرك نحو هذه الزاوية وأشكرك أكثر على إشادتك بها وكاتبها التي نشرت في صفحة عزيزتي الجزيرة..
* للتواصل ص.ب 354 الرمز 11411 الرياض جريدة الجزيرة أو فاكس 4871064 عناية «المسفهل»
| 
