** يقول الشاعر «يا زمان الوصل بالاندلس» وأنا اقول يا زمان الوصل بالقرصان والمرقوق والجريش.
** راز «خشيمه» ويناظر الناس بطرف عينه واقف بسيارته «الكشخة» عند الاشارة! يا رجال تراها «بالتقصيد» لا تنغر!
** وبمناسبة التقسيط ترى 90% من السيارات اللي تشوفونها في الشوارع بالتقسيط حتى المراوح والمراكي والتلفزيونات صارت بالتقسيط!! خوفي بكره يصير الثوب اللي يلبسه الشباب بالتقسيط!!
** شاعر ولا «شارع» بصراحة احترنا مع شعراء آخر زمن! احلى ما فيكم «الرزه» والصورة والا الشعر ما عندك أحد.
** هذه شاعرة أو متشاعرة أو مستشعرة أو مستعرة؟ اختر الاجابة الصحيحة على «قولة» جورج قرداحي!!
** أمس صحفي وكاتب وشهره واليوم «سواق ليموزين» هذه آخرة الصحافة.. آه من الصحافة ودروبها!!
** قال جورج قرداحي للمتسابق «اتصل بصديق» فجأة ظهرت عجوز ما تسمع فكيف تجاوب!! يا غبي كيف «تنتخي» بعجوز!!
** أُم راشد في الثمانين وكأنها ابنة العشرين رشاقة وطول ما شاءالله ولا ضغط او سكر. سألناها ليش قالت أنا أمشي 10 كيلو في اليوم وماني مثل حريم اليوم اللي يأكلون وينامون ويسهرون!
** حتى «البيز» استوردناه معاد باقي الا «المطازيز» و«الجريش» نستورده!
والا وش دخل «الصين» تصنع بيز الدله يا ناس؟!
** تعرفون ليش السعوديين وخاصة «الحريم» ما يحبون يركبون «ليموزين» يسوقه سعودي!
اقول لكم السبب! علشان يعرف وش يقولون وعلشانه يرفع السعر علشان كذا يفضلون وارد الهنيدي والباكستاني وغيرهم!!
** «المطبات» في شوارع الرياض كنَّها «حمير» واقفة يا ناس يا بلدية ارحموا اصحاب سيارات 2002!!
** يقولون الدجاج فيه هرمونات والغنم فيها امراض والسمك في البحر تلوث بالكيماويات اقول لكم ما لنا الا «الكراث» والجرجير وعسى الله يفكنا من مياه «المجاري»!!
** تقول «وردة» ابودعك واودع الدنيا معك وأنا أقول أحمد ربك اللي لقيتي «فرنسي» يقدم لك كبده على طبق من ذهب علشان تعيشي يا وردة.
** أنا زعلان من القراء لأنهم لم يتجاوبوا مع ما اكتب ما عدا واحدة كتبت فاكس تشيد بالمسفهل وما يكتب! بصراحة ودي اقول اسمها لكني اشكرها لأنها رفعت معنويتي الله يرفع معنوياتها بالعافية!
** مع السلامة موعدنا الأسبوع القادم مع خرابيطي ويا ترى من يعيش؟!
| 
