يا للي بصدَّك تعذبني وانا مالي
غير ادعي الله على صدك يصبرني
لو كلمة ارجوك ما هي عيب واتقالي
جيتك وانا أبكي وقلت أرجوك ترحمني
لكنها عيب مرضاها على حالي
ما قولها لو عذاب الحب يقتلني
اقول في بحر هم الحب يالغالي
أصرخ واناديك قبل الموت تلحقني
إلحق على الروح قبل تروح وانشالي
للحفرة اللي عن الدنيا تغيبني
ما عاد بي حيل .. والله صعبة احوالي
اليوم يومك طلبتك فز وانقذني
قاومت الامواج واستسلمت بالتالي
وصارت على وين ما سارت تسيِّرني
وما هيب صعبة عليك تحقق آمالي
وما هيب صعبة عليك انك تريحني
عندك حبال النجاة اللي خذت بالي
وتقدر بيمناك ترميها وتنشلني
فكر وحدد مصيري بعد ما جالي
وان كان يرضيك موتي لا تساعدني
