إعذريني.. ما بقى عندي قصيد
ويش ابكتب لك قصيد وويش أخلّي
القصايد فيك ما جابت جديد
أنتي أنتي ما تغيرتي على اللّي
باع عمره لأجل عين.. ولأجل جيد
وجمّع دموع الحنين وقال: هلّي
الغلا كل ماله بقلبي يزيد
والوله يجتاحني ياشوق كلّي
في عيوني نار.. وبقلبي جليد
واختلط ثلج الشعور.. ونار غلّي
أحتويك من الوريد إليا الوريد
وآصلك بالبال وأنا في محلّي
واخذك بيدك.. ونجلس نستعيد
ماضي الذكرى قبل لا تكون خلي
إضحكي مثل الطفل في يوم عيد
خلي الأحزان عن وجهك تولّي
ضحكتك تسوى القريب والبعيد
وتطلع أحلى لاختلط فيها التغلّي
وكان ودك تسمعين أحلى القصيد
إقري اللي كاتبه لك في سجلّي
