أبفرغ معظم الزاوية اليوم لمداعبة النجوم بس أهم شيء ما يزعلون!.
** إن كان جدتي بيقام لها حفل اعتزال بمناسبة إقلاعها عن القهوة نهائياً فماجد عبدالله بيقام له حفل اعتزال.. يا رجل ترانا ملينا من كثر الكلام والناس تراهم نسوك يا ماجد!.
** أخبر الفنانين «ناعمين» ما يحبون الشوك ولا الحشرات ولا دخان السَّمر لكن خالد عبدالرحمن أثبت انه فنان وسنافي وقناص بعد!! ودي يا خالد توجه الدعوة لعبدالمجيد وراشد الماجد وبقية الفنانين «الناعمين» وتعزمهم في البر نشوف وش بيسوون!!.
** راشد بن جعيثن من مراقب علينا في ثانوية اليمامة إلى شاعر مشهور وعمدة.. صحيح الدنيا حظوظ يا حضرة «العُمدة»!!.
** بصراحة رغم ان ثقافتي محدودة إلا انني أحب ان أقرأ للدكتور عبدالله بن ناصر الفوزان والكاتب الرائع ثامر الميمان ولا أنسى طبعاً «الزول» أبو الجعافر!.
** أتحدى واحد من هالجيل يعرف «المجرشة».. المجرشة هذه كان يجرش عليها «الاولين» البُر وكانت أيضاً زاوية لعبدالرحمن السماري وراشد الحمدان قبل ربع قرن في «الجزيرة» ويا ليت الاثنين يسمعوني ويعيدونها!.
** يا محمد عبدالواحد لماذا اخترت «موال من الشرق» اسماً لزوايتك والا علشانها في «اليوم» لماذا لا تكتب «موال من الغرب» مادام انك في الغربية يا....؟!
** والله ما كبر «كروش» الربع الا هالمكابيس والمفاطيح.
** حريمنا (أكل ومرعى وقلة صنعة) أكل ونوم وجلسة عنذ(الدش) ليش ما يسمنون .. بصرحة (أقدى) رسام الكاريكاتير هاجد فيهم!
** بصراحة سؤال برئ جداً.. كم مفطح مسدوح وكم خروف مذبوح يومي الخميس والجمعة وكم مطبخ مبسوط من هالشغل.. يا ناس ارحموا أنفسكم وبطونكم من ها اللحم والشحم والكلسترول!.
** راحوا ورجعوا صحيح من خرج من داره قل مقداره: يا أحمد الحامد أنت وصاحبك حمد ناصر.. ما لكم الMBC.FM و؟؟ عليكم!.
** الصيف قرب والخوفة الخوفة ان «ترجع حليمة لعادتها القديمة»، أقصد أزمة «المويه» اللي مرينا بها العام الماضي!.
** يا حظ اللي بيسافرون للخارج «براد وسعة صدر» وحنا قاعدين في هالحر وفواتير الكهرب التي تقص الظهر!.
** عطوني «دخل» الجوال يوم واحد واعطيكم أكبر أرباح تحققها شركة في العالم واعطيكم أفضل وأرخص خدمة هاتفية ولكن...؟!
** مسك الختام كما يقول «المليان» نبيل شعيل ما عندي إلا سلامتكم وأتمنى لكم يا أحبابي السعادة في الدنيا والآخرة وكل جمعة وأنتم بخير إن شاء الله.
| 
