Al-jazirah

محاورة محاورة

هذه المحاورة جرت بين الشاعرين الكبيرين / الشاعر خلف بن هذال العتيبي والشاعر الكبير/ مطلق بن حميد الثبيتي «رحمه الله»
خلف:

سلامي سلامي لثبيتي مثل نقد الفلوس
ولا نقبل التاجيل فالملعبه وصفوفها
ابطلع ثلاثة روس واطق روس بخمس روس
وانادي سلاطين المعاني تسل سيوفها

مطلق:

هلا مرحبا ترحيب وافي وليلتنا عروس
نكحل محاجرها وننقش بطون كفوفها
انا عارف الدكتور من عصر قلاع الضروس
ومن واجه ام الصوف ياقف لا يمسح صوفها

خلف:

انا الليله الليله مع الليل اجدد لي لبوس
واباضع على الحجه نقطها واعد احروفها
ليا صار دونك جسر مدروس ما تبغى دروس
عواثير ما تقشح وراها ياكود تشوفها

مطلق:

ليا عمست الاريا على الناس دوس الراس دوس
وخل اليتامى فالذرى واعطها مصروفها
انا اشوف لي داب تثنى ويلحس حد موس
عيونه تقلب فالغرب ما عرفت وصوفها

خلف:

ليا عمست الريا صبرنا وطابن النفوس
تبين النجوم وتنظر الناس كيف ظروفها
تبا تلعب الفيران فالبيت بغياب البسوس
ودابك عن الفتنه يمينه قصر معروفها

مطلق:

أنا يوم اشوف الطفل ابوكفل رضاع الديوس
ابدور امه ثم ابرميه فوق اكتوفها
علوم المطر من كل ديره تجيك ابها العسوس
لكن المطيه شدها طاح فوق اردوفها

خلف:

تحلمت حلم يدوخ الراس والجو معكوس
سعيت الديار وبطن مكه عجزت تطوفها
تمر الغيوم ويطلع الله على خلقه شموس
وابشبك على عش الحمامه واشيل رفوفها

مطلق:

ليا شفت لي صاروخ صيني معه صاروخ روس
ابكف رجلي عن دروب كثير خوفها
انا اشوف غصن يشرب البير واوراقه يبوس
ولو بان زهره فيه شفت الطيور تحوفها

خلف:

ليا شفتلك صاروخ صيني حضر يوم عبوس
تعاف الحياه وتكسف الشمس وانت كسوفها
ترى الله هو الفرد الصمد واحذر الدين الغموس
شهادتك ما تارد وتذلف عساها ذلوفها

مطلق:

تعبنا وحنا ننثر العطر فوق العيطموس
وانا خايف ان العطر يكثر ويدخل جوفها
ابقراء على السجان وافك بيبان الحبوس
واباخذ من السجانه امياتها وولوفها

زهران عون الله المطيري/ بريدة