يشهد الملعب وتشهد ملايين الملا
ويشهد التاريخ والفن والكأس الذهب
واليدين اللي لها الشعب يشهد بالولا
وانديتنا وآسيا وأشهر أبطال العرب
يشهدون ان الزعيم الهلال اللي علا
قمة الابطال راسي مثل قلعة حلب
الهلال وفرقته للبطولات أوكلا
بالجدارة غصب لو يزعلون أكبر شنب
كلما اهتز المدرج هتف له ياهلا
كنها ريحٍ على الباب هجماته تهب
كل نجم له ثلاثة إلى غاب بدلا
ترصد الحراس رصد الشياطين بشهب
زاد في جمهورك الفوز تقدير وغلا
ودها لولا الأدب داخل الملعب تطب
وزاد فوزك في نفوس بها الغيظ يغلا
وعبرت عن حقدها بالجرايد لك تسب
ماعلينا من كلام يقوله مبتلا
خل ناره وسط كبده على كبده تشب
