تقاعدنا بعد عمر طويل في العمل خذناه
ثمان سنين واثنين وثلاثين قضيناها
بذلنا العمر في خدمة وطنا كلنا نفداه
وما أظن أهل الوفا لحقوقنا يوم تناساها
اليهم نشتكي مما نعاني والذي نلقاه
مصاريف تزايد كل عام ما نطحناها
الا يا ملتجا المحتاج ما يخفاك ما أمضيناه
بخدمة هاالوطن في النهضة الله أسس بناها
وماهي منّة منا وفضل الدار ما ننساه
حقوق الدار تلزمنا مع اللي وطد حماها
ولكن النظام أيضا تقاعد واندثر مبناه
معاشات التقاعد لازم ينعاد مبناها
ترى المحسن جزاه احسان عند الله بيلقاه
إذا ساهم برأي الخير نفسه تاجد اجزاها
حكيم ينظر الشكوى وللشاكي يعرف دواه
ويعطي وصفته فيها طبيب يعرف ادواها
رجانا يا ولي العهد فيكم بعد رجوى الله
قضيتنا تحل وحاجة المحتاج يعطاها
عسى ما تبذله من خير عند الله له تلقاه
ولا تخفى عليكم عدة أمور سئمناها
نظام صار فيه قصور والتقصير ما يرضاه
يعرف اللي حصل به من قصور ويفهم اخطاها
عسى ربي يدله بامركم ويوفقه بارياه
حسب توجيهكم ينهى مطاليب طلبناها
