لا تشتكي للناس إلى ضاق بالك
الناس ما تملك مسرة ولا باس
على عظيم الشان وجه سؤالك
وعليك بالعليا وعش رافع الراس
الناس مثلك حالهم مثل حالك
والكل من مر الليالي شرب كاس
والوقت يا العارف لو أنه صفالك
بكره يجي صافيه بالطين منحاس
ساعة طلع ربحك على راس مالك
وساعة تودي بالخساير والإفلاس
لا تحسبن أنك بالتعاسة لحالك
اعلم ترى عايش معك بالشقى ناس
ولا.. لا تكبر لو نجوم السمالك
ملكك على قدك من الشاش بقياس
العمر لو طالت لياليه هالك
ما يختلف ميعاد قباض الانفاس
الموت عنك ما يصده حلالك
لو الجواهر في تعرفك والماس
