في نجد دار الوفاء بالضبط ببريده
درّة قصيم العَطا عنوان فيصلها
حل السعَد وابتدىَ طيره بتغريده
لله در الشجر تغوي بلابلها
بستان نجد انتشى وأطلق عناقيده
وسهول قمحه فرح ترقص سنابلها
في مقدم الشيخ تاج الأمن تجويده
الدار تختال لبست فاخر حللها
شيخٍ وفاء بالوفاء وافي مواعيده
سلايل العود حصن الدار كافلها
ظلع رسى فالجزيرة زاميٍ حيده
نايف وهو نايفٍ بأعلى منازلها
حَلاّل صعب يزيد الضد تعقيده
روس الصعيبات كف الشيخ ذلّلها
وروس المكارم معه تقعد مقاعيده
إليا وقف للثقيلة ما تثاقلها
أمير وإنسان والنجدات هي ميده
وأسمى المبادي خفوق الشيخ شايلها
سلاحه الصبر وإيمانه وتوحيده
بآيات حقٍ على العالم يرتلّها
وحصانه الحزم وإخلاصه وتوطيده
دعايم الأمن وأمانٍ يضللّها
حرٍ سلالة حرار العدل من صيده
المايله نايف بعدله يعدّلها
يزهى القوافي عديمٍ زان تمجيده
لو تقصر حروفها معناه طوّلها
درع الوطن واثق الخطوات مع سيده
سبعٍ ولا يلتفت لأوحى ثعايلها
إليا بدو بالخطا غاوين ترديده
مزامر الشر يفضحها تحاملها
المغرضين امتلوا بالشر مع كيده
صفحات صفراء يميزنا تجاهلها
أبواق زورٍ تجيد الزور وتزيده
بعض الخلايق لزوم نقول ما هبلها
حنّا عيال السعودية مساعيده
جماعةٍ ما قِدَر نذلٍ يضللّها
وإليا اصطفق موجهم يا هون تركيده
حكامنا بالفخر شدّو محاملها
لهم الولاء والوفاء والعهد تجديده
صفوة ملوك الزمن وأصفى تعاملها
إخوان نوره وثبَت العلم وآكيده
سلايل أسياد ما بادت فعايلها
هم ساسة الكون وأجواده وأجاويده
هم علية القوم ما تطمن لا سافلها
وإليا حكى مثلك وشرواك تأييده
فرضٍ علينا وتشريفٍ يكمّلها
يا نايف الأمن يا راعيه يا سيده
كل القطاعات تفخر بك جحافلها
يا نايف الأمن يا فرحه ويا عيده
كل الميادين تزها بك محافلها
يا نايف الأمن مصداره وتوريده
أكبر مهمّاتنا يا مير حاملها
يا حجاب حَد الوطن وآمان تهديده
بوجيه ناسٍ عقود الشر تفتلها
يا ساحل الطيب يا علياه يا بيده
يا منبع الجود وديانه مسيّلها
بنيت صرحٍ كبير وصَعب تشييده
يفخر بك الشعب والديره وعاهلها
