صاحبي هذا زمان قل به من كان يافي
الوفا بين البشر ما عاد له ايّات قيمه
كل من سوا جميل قال بس اليوم كافي
رمية من غير رامي صار يحسبها عظيمة
ما درى ان الطيب ما له لا حدود ولا مرافي
بزعمه انه يوم خلا الطيب كاسب له غنيمه
ما درى ان الطيب فعله بيّنٍ ماهوب خافي
له رجال ترتكي له عندها صبر وعزيمه
له رجال دربها ماهيب تذريه السوافي
جرّته دايم جديده ما ذكر قالوا قديمه
لوتعذّر وقتهم فالعذر ذا كافي وظافي
جاير الوقت ايعذر من كان طيبه هو نديمه
كافي ان الطيب سلمٍ عندهم ماهوب هافي
ما تنحّوا عنه مره عندهم قدر وشيمه
ركبهم تارده ما قد صدّرت منه مقافي
ما خبر قد صدّرت منه ركايبهم محيمه
ينهلون العز من جمّه وكل صار وافي
من ورد هالعد تسمع له على جاله حطيمه
والزمن يا صاحبي لو قل به من كان يافي
جاير الوقت ايعذر من كان طيبه هو نديمه
