لك الله يا طير غدى بالسما مفقود
جرحني ودمعي سال كله من اسبابه
كفخ بالجناح وطار يا حظي المقرود
نوى بالبعاد وجر قلبي أبمخلابه
أصوّت وأنادي له وهو ناوي بصدود
تركني ولا كنت احسبه يترك أحبابه
فلت من يديني واحسب انه علي يعود
حسيبي على ذاك البخت يوم ما جابه
وقف في دروبي عن وصاله حرس وجنود
بغيت أوصله لاشك حديت عن بابه
وهو يحسبني ناسيه ما درى بالسود
تهل الدموع وصاح قلبي من اعذابه
رحل ما درى عن نية الخافق الملهود
ياليته فهمني ما جرحني على غيابه
حسبني تركته يوم صار الزمن محدود
وانا اللي صفيت وخافقي ما تردابه
وانا ليت طيري في ربوع الوطن موجود
يشوف الصحيح وكل شيء سعينا به
ولاشك طيري طار يا حظي المقرود
نوى بالبعاد وجر قلبي بمخلابه
