هلا بك كل ما هب الكلام وجابك الطاري
هلا بك ترسم الدرب الطويل احلام وردية
هلا بك يابعيد عن هناي ونشوة اشعاري
هلا بك لو طواك الصمت في صمتك شفافية
عرفتك واقفت ركابك عن دوربي ومشواري
وفز إلك الغلا كل الغلا في كل عفوية
وصلت لباب روحي قبل ما أدري وآخر اخباري
وشفت جروحي اللي عند غيرك حيل عادية
حكت لك عن هناي وعبرتي والعثرة أسراري
وسافرت بحياتي لأول الونات والكية
أذا كنت انت لكنك قضيت العمر متواري
عن افراحي عن جراحي ودنياي الرمادية
انا ياماقطعت العمر يمك بالمدى ساري
ادور بالملامح والمحاجر منك مارية
تعبت وملت أيامي وطالت سكة اسفاري
دليلي قلبي الضامي وصدق الهم والنية
تمنيتك تكون أول ربيع وعيت اقداري
وسرت روحي بدونك وحشة الغربة خلاوية
كتبتك ما عرفتك وانتثر ريحك مع الذاري
على نبت الفياض وقالتك ريح هواوية
حكيتك للنجوم وللقمر ياشاعر اسحاري
ونادمتك خيال وهمسة عذبه وسرية
نثرتك في قصيدي والخبر من صحتك عاري
وقالتك القصايد صورة عندي ومنفية
عشقتك سرما يحكي وأنا ما كنت بك داري
ويوم اني عرفتك كنت صفحة عمر مطوية
وش اكتب لك وش احكي لك وش اخفي عنك واداري
رحلت ومنك في كل المشاعر صورة حية
الطبعة الاولى