قالوا ياكثر الجرايد قلت ما اكثرها
صفحاتها واجد وتحير الشاري
لكن وش لي بعامرها ودامرها
غير الجزيرة ترى ما نيب مختاري
فيها مزايا لزوم اليوم نذكرها
صار التميز لها عنوان وشعاري
فيها هل الشعر تعلن عن مشاعرها
والشعر حكمه وله وزن ومعياري
وفيها قلوب الهوى تنزف خواطرها
وفيها هل الشور تلقى كل الاشواري
من عقب ذا واعذب القيفان اسامرها
لعل من هي تخصه يعرف اخباري
اللي عليه الدموع اعمت نواظرها
قفى ولا عادله ذكر ولا طاري
عقبه ليال الشقا بالهم اساهرها
ما يرحم الحال يوم تجيه الاعذاري
وش فيه سويت يوم النفس يقهرها
وانا الذي فيه غنيت اجمل اشعاري
يازين ذي حالتي بالشعر اسطرها
والحال ما تنشكي يا كود للباري
اعطيك حلين نفسك لا تحيرها
ما فيه ثالث عليه تلد الانظاري
اما اجبر الحال والا زيد واكسرها
عقبك تراني باموت وموتي اجباري
وان مت انا من هواك النفس تعذرها
اموت راضي ولا احد ياخذ بثاري
