كان الليالي كلها زي ما أشوف
الله يعين العين لاطول الليل
وش بارتجي من ونة تجرح الجوف
اللي لها بأقصى الحنايا مداخيل
اقرب من الابهام وأبعد من الشوف
واصدق من اللي تلني بالمظاليل
وأنعم من الديباج وأدفا من الصوف
وأرق من نسمة ليال التعاليل
عجزت أميزها ولا ألقالها وصوف
ما غير اروضها بصدري مواويل
احيان اغنيها وانا خوفي الخوف
اني اجاملها بليا محاصيل
ولو تبتسم في وجه الايام وتروف
ما كان صدري ضاق ويشيل ويشيل
حتى السلام ليالفا منك معروف
وأنا عزيز ما جذب راسي بخيل
مير الزمن طبعه على مثلي يطوف
والمهتني من شق صدر الغرابيل
وكان الليالي بالخفا تجرح الجوف
وشلي بليل تنقطع دونه الخيل
