يقوله اللي درى لو ما قرا بالكتاب

يفهم معان الكتابة قبل يقرابها

ما قلط اقدام رجليني لجحر الدواب

أدخل على الله من الحيات وترابها

ألا ولا آرد على ميراد شهب الذياب

اخاف من وردةٍ ما ظهر من انشابها

هذا ويا من تسمّع قول راع الجواب

يهدي النصيحة وهي ما كان يهدابها

حاذور حاذور من نظرة لميع السراب

القايله لا تغرك هي وما جابها

والعد لا تارده ميراد عكف الركاب

تصدفك حذفت صدف لو ما تحرابها

ولا تقول اني القاري على كل داب

ما كل سيات الارض بينقري دابها

انا تعجبت من زولٍ بكل العجاب

يبي طروق الهوى وامضيعٍ بابها

بغا مماش الحمام وصاد ممشا الغراب

وش ولعه بالحمامة هي وهندابها

نغق نغيق الغراب وصار أخس الدواب

والمشية اللي بغاها اخطا ولا صابها

يا كثر ما تستر العورات لبس الثياب

احمدك يا ساتر العورات بأثيابها

احب نقع الصفا اللي فوق روس الهضاب

إلى حصل للقدم يقلط ويرقابها

حيث انها مستقر النقع هشم السحاب

مجهولة المعرفة ما هوب يدرابها

فيها قراح عذيٍ من لذيذ الشراب

قرطوع ساعة عن الدنيا وعن ما بها