يا العبد قيس ماطرا لك على البال
دنياك لا تلهيك عن تبع دينك
واعرف ترى ماقسم لك مابه اشكال
يجيك لو كل العرب حاسدينك
والمال مثل الفي لابد ينزال
مر عليك ومرة في يمينك
والفرق في تبريق ربك بالاعمال
في ساعة تذهل بها والدينك
واعرف ترى الدنيا لها كم ختال
ولقافة لابدهم صايدينك
تعمل بها اشغال وهي لك بالاشغال
وعقب المعزه قل فيها عوينك
فان ساعفت دنياك بالحال والمال
تحمد الوالي وباعد قرينك
وان كان بك عدلات الايام ميال
تمسى مقل وغلمة ضاهدينك
لا تشكي احوالك ولو طقك الحال
الاعلى الكاتب بعالي جبينك
اللي الى ما انه حشم عز وجلال
تنفعك حشماته ولا احد يهينك
والا رفيق صاحي ماله امثال
ما اضمرت به لزمٍ تشوفه بعينك
اياك والمرسال ومقرب سال
من الراس حيث الراس تبرج قرينك
في حزة اللزبات ماشلت له شال
وإلى اخلفت يصبر بزينك وشينك
واقرا بك اللي تمتنيهم بالافعال
وهم بحزات اللزب ممتنينك
معهم جمال ومال والعبد عمال
ابنك حتين فلان وابنه حتينك
لو كنت دبوس لهم عوق من عال
تفك مشكلهم وهم خابرينك
تفتل لك الدنيا كتافين وعقال
ويغضون عنك وكنهم جاهلينك
فاشنح لمن مداته جزال وعجال
يمد لك يوم انهم حاقرينك
بلكي تذعذع لك على روس الاقذال
وتكيل وافي صاعهم في ثمينك
ولا تستمع في هرج نقال من قال
خله يقل الحكي بينه وبينك
وسرك فلا تعطيه عم ولا خال
كم واحد بالهرج يبحث كنينك
مقعدك مع ناس لهم عنك منزال
لاهم براجينك ولا خايفينك
معهم خبرك وكايلينك بمكيال
على العسر والميسره عارفينك
في مجلس مالك مقام وتفصال
أخير ما تفعل مقامك بحينك
