يا الله يا مكون بالاجسام الارواح
يا كاتب الارزاق والاجل باللوح
يا اللي بتقديرك تصاريف الارياح
بمرك وتسهيلك عبر البحر نوح
تجعل لنا بهداك ممسا ومصباح
واجعل لنا في طاعتك صدر مشروح
قبل انتداب اللي للاعمار يحتاج
اللي من اعصاب الجسد ينزع الروح
مهما تقدم علمنا والجهل راح
الملتزم من بعض الاشكال مجروح
يشوف بعيونه تقاليد واشباح
وملابسٍ تلبس على جسم مفضوح
لبس الخوارج عندنا زاد وانساح
وهذا خطا ما هو للاسلام مسموح
وكثر التبجح والتفاخر بالافراح
ينخاف من عقباه تبذير مسفوح
تبذير للنعمة وتنثير وشفاح
وبعض الشعوب بغيهب الجوع مطروح
ما فيهم اللي من طوى الجوع مرتاح
اللي هلك واللي على الجنب مسدوح
ما نعتبر ونكرر الشكر بالحاح
والموعظة نلقى لها سمع وشبوح
الدين له مرشد وللخير نصاح
وباب الكرامة للمنيبين مفتوح
وحفظ الشرف والدين للمسلم وشاح
تاجن على ماتنه من الرب ممنوح
الدين بالدنيا لنا عز وسلاح
وبالآخرة نور لنا بالدجا ضوح
والصبر والتوحيد للخير مفتاح
وهدي النبي توجيه ناصح لمنصوح
واللي ربح يوم الخساير والارباح
اللي كتابه عن خطاياه ممسوح
