واعذاب المولع من كثير الهموم

يقضي الليل كله ساهر ما ينام

ومن يلوم المولع لو قعد ما ينوم

دامه انحا جنوب وصاحبه راح شام

مبعد عن وليفي لي ثلاثين يوم

هي قليله وعندي كنها الفين عام

باح صبري وصبره والصبر ما يدوم

وصبرنا وصل حده والضماير حيام

عن عذي الشفايا من يجيب العلوم

ومن يودي علومي للغضي بالتمام

أتذكر من اول تحت ضوء النجوم

يوم اسامر وليفي والخلايق نيام

كانت ايام حلوه عرضت كالحلوم

لو تكلمت عنها ما يفيد الكلام

في هوى شف بالي لو قفا اللوم لوم

ما توحى ولا اسمع في هواه الملام

هو مناتي وشفي وافهموا يا الفهوم

هو غلايه وحبي والهوى والغرام

عد رمل النفود وعد ناس تصوم

وعد ماهل وبل من صدوق الغمام

وعد ما بالخضيرا من طيور تحوم

لريش العين مني كل يوم سلام